在文化中心聽了 4、5 小時的《女武神》，散場出來已差不多 8:30pm，坐到 pat 痛又餓得發慌，還是留在尖沙咀吃埋晚飯才回港島好了。大蝗蟲身體不適，不能喝酒之餘，焼物、炸嘢、辣嘢、生冷嘢統統不能碰，幸而近水樓台的海港城有一間 叫餸食飯 的 廣東茶居，以前還聽過有食友以「去親海港城都會忍唔住去」形容自己對它的鍾愛，又過去試試吧。
天天老火湯 是 老黃瓜赤小豆煲唐排，喝起來甘甜鮮美沒 MSG，而且火喉十足，滿滿的住家味道非常討好啊！雖然小小一盅賣 50 多元絕不便宜，但二人分享份量剛好，沒所謂啦。
貴妃雞（半隻）：雞皮又薄又滑，雞肉則好壞參半，皆因黑肉算是嫩滑，白肉卻又硬又嚡！
南乳粗齋煲：賣相粗枝大葉其實不是大問題，始終它叫「粗」齋煲嘛，但每一條菜心也大大碌，成棵樹咁叫人怎吃？其他餸料有竹筍、雪耳、茄子、粉絲 etc，然而成煲嘢的南乳味也非常淡薄，蠻掃興的。
最後是細 size 的 臘味油鴨髀煲仔飯，賣相又是不修邊幅，這裡予人的感覺也真夠 hea 啊？
先談臘味，以臘腸、膶腸最好吃，前者香甜帶酒香，後者更是甘香無比，喜歡啊！油鴨髀味道也不錯，鴨肉雖硬身但鹹香非常，不過就斬得幾碎濕濕吓；下面的米飯則完全不行，太軟、太濕了，我在吃糊仔乎？
食物不怎麼樣，那配套又如何？環境是光鮮企理的，阿姐卻是超沒禮貌，我們到步時向她示意「兩位」，她的反應先是「等陣啦，執緊檯呀」，隔了一會則是「喂，呢邊呀」，乜料？真想反問她「喂咩呀喂？前世欠咗你㗎？」！
埋單每人約 HKD250，吃得不太滿意，不會再來了。
環境：3.5/5
服務：2/5
廣東茶居 (Canton Deli)
尖沙咀廣東道 17 號海港城港威商場 3 樓 GW3303 號舖
http://www.harbourcity.com.hk/tw/dining/all-restaurants/find-restaurant-by-category/chinese-cuisine/item/7452-canton-deli
No comments:
Post a Comment