我們的自家出品 -- 五香滷牛腱

一直想試做 滷水牛𦟌，除了因為每次吃台灣或上海嘢，大蝗蟲也總會點來吃，亦因為滷牛腱是吃麵加餸的不錯選擇嘛。直至日前買了急凍美國牛腱心，聖誕假期終於有時間把早前煮完雞翼後儲了在雪櫃的滷水汁「循環再用」，做一 batch 五香滷牛腱 了。

上文提及的 急凍美國牛腱心 一包有兩條，淨重約 600g，購自堅尼地城一家急凍食材店。

牛腱解凍、係咁易沖洗後，放進鍋裡並注入冷水至蓋過牛腱；開火煮滾後轉中火，由它滾煮 8-10 分鐘，讓肉裡的雜質自己跑出來。8-10 分鐘後，把牛腱（註：縮水是正常的，請放心）撈返上來沖淨。

與醉雞、醉蛋一樣，滷牛腱都是先炆後浸，所以把牛腱撈上來後我還在它表面 刺洞，方便炆煮、浸滷時較易入味。

下圖就是較早前煮過雞翼的 滷水汁，在雪櫃內儲了 3 個多月後拿返出來用，變了啫喱狀呢。

雖說第一次做滷水汁時已下了 滷水料 同煮，惟「舊汁新煮」要再加水、加豉油 etc，所以我也額外放了家裡僅有又適用於滷水的香料，花椒、八角、月桂葉 之類全數放進茶袋內，方便炆好後隔渣。

而由於香料種類嚴重不夠，我還下了 五香粉 1 茶匙，盡可能增添辛香啦。

另準備 蔥白、蒜瓣、薑片 及 乾蔥，份量隨意；下鍋前記得先把料頭 拍扁 啊。

舊滷水汁下鍋加熱煮開，加入 生抽 2 湯匙、老抽、紹酒 各 2 茶匙、清水 約 150mL 及 上述 香料、料頭，大火煮滾。

記得自行試味決定需否調整調味料的份量啊

加入 已汆水的牛腱 及 冰糖 1 湯匙，煮滾後轉最小火，冚上鍋蓋先 (1) 炆 1 小時，繼而 (2) 關火焗半小時，再 (3) 多 炆半小時。兩小時過去後，牛腱應該已炆腍的了，自行以木筷子「篤」吓佢來檢查軟熟程度吧。

關火，把牛腱移至有蓋的器皿，把滷汁隔渣後倒回牛腱去，冚蓋並 放入雪櫃浸泡過夜。

第二天晚上拿返出來，牛腱會 firm up 不少，硬硬哋的 切片（愈薄愈好吧）會容易得多。

滷水汁 冷卻後會變成啫喱狀，舀 一湯勺左右 的份量加熱，澆到已切片的牛腱上，食得！室溫吃的牛腱 firm 而不硬實，熱食的話則較鬆化，而先炆煮、後浸滷果然超入味，每一口都是香濃芳香，且鹹、甜比例剛好，大成功也！

把吃不完的牛腱放進保鮮袋，再放回雪櫃儲存，第二／三／四／五天 煮麵吃隨時拿來加餸，既美味又方便呢。

配刀削麵又得

配出前一丁，加點豆瓣醬，變成 A 貨滿漢大餐亦得。得咗！